"زوتوبيا" فيلم عن الحيوانات موجه للبشر

فيلم Zootopia أو "زوتوبيا" هو فيلم رسوم متحركة احداثه بتدور في مدينة اسمها "زوتوبيا" حيث تعيش الحيوانات حياة عصرية حضارية متقدمة جدا زي البشر بالظبط وبيحكم ما بينهم قوانين الكل بيحترمها من اول الاسد والفيل والتعلب والارنب لغاية الفار، بطلة الفيلم ارنبة اسمها "جودي" جاية من الريف لمدينة "زوتوبيا" عشان تشتغل شرطية واللي فضلت تحلم بكده طول عمرها على الرغم من اللي حواليها كان بيحبطوها ويقولوها انتي ارنبة ومستحيل تبقى شرطية لكن هي اصرت على حلمها وحققته.

 الفيلم بيظهرلك ازاي الحيوانات بتعيش مع بعض في سلام دون عنصرية او كراهية او عنف على الرغم من انواعهم الكتير المختلفة، لكن اما بتختفي بعض الحيوانات المفترسة بتضطر الشرطية جودي تبحث عنهم وفي الاخر بتلاقيهم لكن نقطة التحول في الفيلم هي لما جودي بتظهر في الاعلام عشان تتكلم عن الحادثة، بنلاقيها fدون ادراك منها بتتكلم بعنصرية عن الحيوانات المفترسة وانهم خطر ع المدينة وده بيؤدي الى انقسام المدينة واضطهاد الحيوانات المفترسة بها.

 جودي بعد كده بتدرك الخطأ الكبير اللي عملتها واللي من خلاله دمرت مدينة "زوتوبيا" الجميلة بسبب كلمتين قالتهم في الاعلام.. فيلم "زوتوبيا" خياله واسع اوي مش عشان عن الحيوانات بس لاء عشان تخيله انه هيجي يوم والحيوانات هتعيش مع بعض في سلام حياة عصرية متقدمة دون اضطهاد او عنصرية في الوقت اللي البشر بيقتلوا فيه بعض ومش عارفين يعيشوا مع بعض زي الحيوانات حتى .

فيلم "زوتوبيا" عن الحيوانات لكنه موجه للبنآدمين وبيدعوهم للتخلي عن العنصرية والكراهية عشان يعرفوا يعيش مع بعض في سلام قبل فوات الاوان. فيلم "زوتوبيا" على الرغم من انه فيلم رسوم متحركة لكنه بيحمل معاني انسانية ورسائل جميلة جدا.. فيلم "زوتوبيا" عايز يقول من الاخر ان العنصرية والكراهية بيدمروا كل شئ ولن ينعم البشر بسلام دون التخلي عن تلك العنصرية والكراهية... اجمل حاجة في الفيلم هي جملة "بوسع اي احد ان يكون اي شئ" واللي كانت دايما بطلة الفيلم "جودي" بترددها كإصرار منها على تحقيق حلمها وعدم اليأس.

هل نحن نعيش حياة حقيقية أم مجرد فيلم؟!

في فيلم The Truman Show او "عرض ترومان" بتاع "جيم كاري" بيظهرلك في البداية ان البطل عايش حياة طبيعية روتينية زيه زي أي حد... الفيلم بيبتدي بعرض نبذة عن حياة البطل اللي اسمه "ترومان" وبيعمل ايه طوال اليوم بداية من الصبح لحد بليل وكمان علاقته بمراته وصديقه الوحيد وزمايله في الشغل..مع الوقت البطل بيحس انه مش سعيد وبيزهق من حياته الروتينية المملة دي وبيبدا يفكر في حبيبته زمان قبل ما يتجوز واللي خرجت من حياته بشكل مفاجئ وغامض وبدون اسباب وميعرفش عنها حاجة غير انها عايشة في بلد بعيدة عنه.. وان ازاي اتجوز مراته دي وهو مبيحبهاش " يعني زي ما بنقول كده الجواز قسمة ونصيب وده قدر".

 المهم في يوم وهو رايح الشغل الصبح لاقي ابوه اللي مات من زمان في الشارع.. فمصدقش من المفاجاة... وقام جاري عليه قاله ابويا ابويا... لكن جم ناس خدوا ابوه بسرعة وركبوا اتوبيس وهو معرفش يلحقهم.. بعديها راح لامه وامراته وقالهم انه شاف ابوه.. فتريقوا عليه وقالوا ابوك مات من زمان ده اكيد واحد شبهه بس هو برضو حط الموضوع في دماغه ومنسيهوش.. المهم تاني يوم وهو رايح الشغل قاعد يراقب الناس اللي حواليه لاقهم كلهم عمالين يعملوا حركات مكررة رايحين وجايين وخلاص.. فقال لمراته فمراته قالتله دي اوهام يا حبيبي.. بعديها قرر يسافر لحبيبته في البلد البعيدة فراح مكتب سفر قالوا مفيش حجز لمدة شهر..فراح يركب اتوبيس قام الاتوبيس اتعطل ورجع... فقام واخد عربيته فلقى فيه وباء منتشر وقافلين الطريق...يعني كل الطرق بقت مقفولة بالنسبة له ما عدا البحر بس هو بيخاف من البحر عشان وهو صغير كان مع ابوه في وسط البحر والمركب اتقلبت وابوه مات فده سببله عقدة من البحر.. فبيرجع يعيش حياته المملة تاني او بيظهر كده لكن في دماغه بيحاول يربط كل الاحداث اللي حصلتله دي ببعضها.

المهم مرة واحدة لقوه اختفى خالص ومش لاقيينه.. كل الناس بتعد تدور عليه لكن من غير فايدة.. في الوقت ده انت بتكتشف ان كل الناس اللي كانوا حوالين "ترومان" بيظهروا على حقيقتهم وانهم مجرد ممثلين بس بيؤدي دورهم في مسلسل " ترومان" حتى مراته وصديقه ممثلين... المهم في النهاية لاقوه في البحر ع مركب مع انه عنده عقدة من البحر..بس هو قرر يخاطر ويواجه خوفه لان مفيش حل تاني قدامه..
المهم في المشهد الاخير "ترومان" بيكتشف انه في مسلسل وكل حاجة حواليه مكنتش حقيقية وانه كله تمثيل في تمثيل ما عدا "ترومان" هو الوحيد اللي كان فاكر انه كل شئ بيحصل حواليه حقيقي ..حتى اما عدى البحر لاقى السما مش حقيقية.. وان هما كانوا بانيين المدينة دي كلها مخصوص عشان المسلسل وزرعوا فيها 5000 كاميرا عشان يراقبوا "ترومان" في كل حتة..كل ده طبعا بيحصل وبيتذاع والناس بتتفرج عليه.

المهم في اخر حتة في الفيلم المخرج بيسترجى "ترومان" عشان يفضل وميمشيش وان الدنيا بره وحشة وان افضل له انه يفضل في العالم اللي هما صنعوه ليه ده.. لكن ترومان بيقرر يخرج لدنيا الواقع في النهاية... يا ترى انت كمان عايش زي "ترومان".. حياتك حقيقة بجد ولا كله تمثيل في تمثيل وانت معتقد ان كل شئ بيحصل حواليك حقيقي عشان هما مقالولكش ان ده فيلم..يا ترى يا هل ترى؟!